Блоги LEPEL.BY
БЛОГИ


 

Блукач ВАЛАЦУЖНЫ: 21.10.2018 (08:12) — 1 год назад

ЧАЛАВЕК У КАНАВЕ. ЛЮДЗІ НЕПАКОЯЦЦА

 Сегодня: 1, за неделю: 7, всего: 1101

 Звесткі аб аўтары глядзець тут.

 На здымках адсек чалавеку галаву, каб не выдаваць яго знаёмым.

 Збіраюся выходзіць з музею. Забягае жанчына. Кажа, што за вуліцай Максіма Горкага ляжыць веласіпедыст пад слупам. Можа разбіўся. Трэба разам паглядзець.

 Дзве супрацоўніцы музею ідуць на месца здарэння. Я – за імі.

 На ўзбочыне вуліцы Калініна ляжыць чалавек з веласіпедам. Ногі спушчаныя ў сцёкавую канаву. З канавы расце электрычны слуп. Такое ўражанне, што веласіпедыст у яго ўрэзаўся.

 Жанчыны пачынаюць лёгенька штурхаць ляжачага. Не рэагуе. Тады адна кажа:

 - Трэба хуткую дапамогу выклікаць.

 Непрытомны просіць:

 - Не трэба нікога выклікаць.

 Падумаў, што ён паламаў ногі. Пытаю, ці баляць яны. Адказвае, што не.

 - Тады ўставай, - загадваю.

 - Не магу, - бармоча.

 Адзін выцягнуць яго з канавы не магу. Тады жанчыны клічуць мужыка ад суседняга дома. Той кажа, што не трэба чапаць: сам праспіцца. Аднак маладзіцы ўгаворваюць яго і прахожага мальца дапамагчы. Утрох выцягваем бедака з канавы. На нагах стаіць, але толькі пры падтрымцы. Самастойна не можа, падае. І зноў просіць нікога не выклікаць, пакінуць яго. Тады кажу:

 - Калі мы цябе кінем ляжачага, нехта ўсё адно выкліча міліцыю ці хуткую дапамогу. Не кладзіся. Апусці ногі ў канаву і сядзь на бераг. Вады ў ёй няма. Працверазееш і пойдзеш.

 П’яны паслухмяна выконвае загад з маёй дапамогай. Адна жанчына пытаецца:

 - Можа патэлефанаваць каму-небудзь з родных, каб цябе забралі?

 - Я жыву адзін, - адказвае. – Адсяджуся і зайду.

 - Ты разважаеш, бы цвярозы, - кажу. – А на нагах не трымаешся…

 - Не слухаюцца яны, - адказвае. – Усё будзе нармальна.

 Мы пайшлі. Ужо ад музея я вярнуўся, каб упэўніцца, што п’яны не лёг. Той сядзеў роўна, панурыўшы галаву.

 Чапаць яго не стаў. Адсядзіцца і дойдзе да дому. Каб толькі ніхто не выклікаў міліцыю. Шкада небараку.

 Мне спадабаліся паводзіны жанчын з музею. Не пакінулі чалавека ў бядзе. Прапанавалі свае паслугі. І толькі калі ўпэўніліся, што з п’яным будзе ўсё добра, пайшлі ад яго. Каб усе паступалі так, менш няшчасцяў было б.

19 кастрычніка 2018 году.









Авторизуйтесь, чтобы оставить комментарий
либо используйте:




Темы автора



 
Яндекс.Метрика

Copyright © 2009 - 2019 — Леонид Огурцов

LEPEL.BY - Карта Лепеля

Пользовательское соглашение